sexta-feira

AGRADECIDA!!!


Que esta nova aventura chegase a ser unha realidade débese a que moitas e moitos de vós nos axudastes a facela posible.

Polo tanto, non quero dar por rematado este blog sen reiterarvos unha vez máis o meu/noso agradecemento. Grazas a vós e grazas tamén aos neniños e neniñas do orfanato de Vorzel´ que nos fixeron sentir tan ben axudándolles só un pouquiño. 

quinta-feira

VIAXE A UCRAÍNA (DÍA 4 DE 4)


KIEV – FRANKFURT – MADRID – MUIMENTA

Hoxe tampouco puxemos o espertador, entre a claridade que entra pola ventá e as idas e vidas dos nosos compañeiros de cuarto, foi doado espertar ás 9 da mañá. Almorzamos co leite, galletas, plátanos e pan que gardabamos na cociña e aseámonos para iniciar a longa viaxe de volta a casa.
Ás 11.30 xa estabamos no aeroporto de Boryspil dispostos a devolver o coche de aluguer que tan ben nos veu estes días. Deixámolo no aparcamento e o rapaz da axencia confirmou que todo estaba correcto. Dirixímonos entón aos mostradores de facturación e enviamos a nosa equipaxe, agora máis lixeira, con destino Madrid.




Con moita puntualidade embarcamos en Kiev para voar durante tres horas ata Frankfurt, alí estivemos cinco horas e reanudamos a viaxe ata tomar terra en Madrid ás doce da noite, aproximadamente.



Alí nos esperaba o noso coche ao que subimos de contado e que nos levou ata Muimenta case sen parar. Así chegamos a casa xusto cando Iago e Ánxela ían saír para o instituto, chegamos tamén a tempo de espertar a Paulo e deitar a Rosalía pois, a pobre, viña rebentada. Que ben o fixo!
Pouco despois tomamos unha ducha, unha abundante dose de café e así comezamos a xornada laboral cheos de satisfacción e endorfinas.

Moitas grazas por acompañarnos!!!


VIAXE A UCRAÍNA (DÍA 3 DE 4)



KIEV – VORZEL’ – KIEV

Esta noite xa descansamos no cuarto que compartimos con outros catro rapaces. Durmimos moi ben. Ás 12.00 quedaramos con Natasha na entrada principal do hipermercado Auchan, así que despois de pasarmos polo banco para cambiar de novo euros por grivnas, acudimos á cita con ela.




Collemos tres carriños que axiña enchemos ata arriba: 60 quilos de deterxente, 17 paquetes de pañais de todas as tallas e 100 paquetes de toalliñas húmidas. Este foi o primeiro lote e por el pagamos 4159 grivnas (395€). Saiunos así a 1,50€ o quilo de deterxente, 15€ cada paquete de pañais e 0,50€ cada un dos de toalliñas. Como ocupaban moito volume non fomos quen de meter máis mercancía no coche e con iso marchamos cara a Vorzel’ de novo. Desta volta fomos polo camiño curto que agora xa coñecemos e así, en pouco máis de media hora, xa estabamos ás portas do orfanato descargando o material.







As coidadoras recibíronnos de bo grao e chamaron á doctora que entendemos que ten algo máis de autoridade e capacidade de decisión pois dixeron elas que se a directora sabía que nos recibían, era seguro que perderían o seu traballo :( 
Ao mesmo tempo, insistían en que precisaban para os nenos todo iso que lles levabamos e mostrábanse agradecidas. A doctora chegou despois de media hora e foi moi agradable con nós, anotou todo o que lles entregamos e asineille o documento no que recolleu toda esa información. Dixémoslle que volveríamos á tarde con alimentos e pareceulle moi ben, só nos pediu que os levásemos ao edificio no que xa estiveramos onte. Era unha muller maior, doce, próxima, de moño gris e trato agradable. Menos mal! 
Ademais, insistiu en que cando volvésemos pola tarde Rosalía podería xogar un pouco cos nenos xa que agora estaban durmindo.



Para non perder tempo, en vez de volver a Auchan acudimos a outro supermercado máis pequeno pero próximo ao orfanato, na localidade de Bucha. Alí aproveitamos tamén para comer nós algo.
Nese novo supermercado (Eko Market) enchemos seis carros que tivemos que transportar ata o orfanato en dúas viaxes xa que non nos collía todo no coche. Desta volta só mercamos alimentos: 120 l de zume, 100 l de aceite, 88 kg de pasta (fideos e macarróns), 20 kg de lentellas, 26 kg de arroz, 10 kg de cereais para papilla e 26 kg de froita (kiwis, plátanos, laranxas, uvas, pexegos e aguacates); sorpréndenos que os prezos non sexan máis baixos pois, aproximadamente, o quilo de pasta custa 0,60€, o de arroz 0,90€, as lentellas 1,10€, o aceite mercámolo de 1,50€ e de 2,40€ e os zumes de froita custaron 0,08€ uns e 0,12€ outros. Aquí pagamos 2368,31 grivnas da primeira vez e 2329,70 da segunda. En total suman 4698,01 (447€).








Recibíronnos de novo no edificio ao que quedaramos de ir e alí contabilizamos todos os productos coas coidadoras e mais a doctora, asinamos o documento de entrega que elas elaboraron e insistíronnos para xogar cun par de nenos dicindo que debían ser pequeniños para evitar que o contasen diante da directora ;)
Máis tarde, despedímonos dos nenos e delas que repetían unha e outra vez a necesidade que tiñan deses alimentos e que nolos (volos) agradecían de corazón. Seguro que si! Isto fainos pensar que toda a axuda que se queira prestar a estas persoas debe ser supervisada para ter garantías de que lle chega aos nenos e nenas que tanto a precisan. Vemos que é doado que, con tanta burocracia e posible corrupción, as axudas non cheguen ao seu destino. Alegrámonos moito de ter chegado ata aquí e poder contarvos que as vosas desinteresadas aportacións hoxe cobren parte das necesidades daquelas nenas e nenos ucraínos.





E con esta satisfacción regresamos a Kiev cando xa era noite. Paseamos polo centro da cidade en compañía de Natasha e despedímonos dela ás 21.30 na boca do Metro que a levaría ata a súa casa. Prometémonos seguir en contacto e gustaríanos recibila algún día na nosa casa. Acolleríamola encantados!





Tras esta despedida marchamos para o albergue e fomos cear a un restaurante no que xa estiveramos con Iago, Ánxela e Paulo no verán. Ceamos moi tranquilos e contentos despois dunha xornada chea de emocións e satisfaccións. 




Deitámonos tarde pero dispostos a descansar para afrontar o día de mañá que se prevé longo e agotador…

Boas noites!


terça-feira

VIAXE A UCRAÍNA (DÍA 2 DE 4)



KIEV - VORZEL' - KIEV

A verdade é que non tiñamos porque madrugar xa que quedamos en vernos con Natasha ás 14.00 despois de rematar as súas clases de español na Universidade, pero a ilusión fixo que ás 9.00 xa estiveramos na ducha e preparando o almorzo tras baixar ata o banco para cambiar euros por grivnas e mercar leite, café e galletas. Só botamos en falta un coador pero improvisámolo de contado cun calcetín ;)




Axiña estivemos preparados e saímos co coche ata o centro da cidade. Paseamos polas enormes rúas de Kiev e contemplamos as dúas igrexas principais que chaman a nosa atención por esas impresionantes cúpulas douradas, baixamos ata a Praza da Independencia e sentamos na cafetería onde quedaramos en vernos coa nosa amiga ucraína.

 




Natasha é unha rapaza de vinte anos e é encantadora. Estuda linguas na Universidade de Kiev e ten moito interese en aprender español. Coñecémola casualmente poucos días antes de viaxar a Ucraína no verán coas Mochilinhas de Cores tras fallarnos a persoa que tiñamos como contacto. Foi unha sorte! Natasha vive coa súa nai e tres irmáns varóns (21, 6 e 4 anos) dos que dous son xordos polo que tamén domina a linguaxe de signos. Tivemos a gran sorte de poder visitalos na súa humilde á vez que acolledora vivenda chea de calor humano. É, sen dúbida, unha rapaza encantadora!!!


Estando xa con ela, chamamos á directora do orfanato de Vorzel’ para dicirlle que estaríamos alá nun par de horas… E agora, por favor, permitídeme un inciso.

"Cando pensei en artellar isto da “Cestinha de cores” e previo a botalo a andar, falei con Natasha contándolle que, cando estiveramos no verán no seu país, pareceunos o de Vorzel’ un dos orfanatos con máis carencias e pedinlle que contactase coa súa directora para ofrecerlles axuda. Foi nese momento cando a directora manifestou que precisaban pañais, deterxente, alimentos… e eu puxen en marcha o proxecto. Hai cousa de dous meses conteille a Natasha que tiñamos 1020€ para mercar eses produtos e pedinlle que confirmase con ela as necesidades do orfanato. A directora tardou en responderlle e daquela dixo que non o podería concretar ata uns días antes da nosa chegada. Desde febreiro sabía que estaríamos en Ucraína os días 12 e 13 de abril. Nesta mesma semana, e a tan só tres días da nosa chegada, dixo que o que precisaban eran cartos (grrrrrrrr…) porque pasaran moito frío no inverno xa que a calefacción non funcionaba e fixeran traballos de fontanería polo que tiñan unha débeda de 6000 grivnas (570€ aproximadamente), o resto dos cartos que xuntamos tamén os quería en metálico para mercar “ela” produtos como pañais, comida ou deterxente.
Xa desde Muimenta lle mandei recado por Natasha de que lles pagaríamos a metade da súa débeda (3000 grivnas que equivalen a 285€) e que o resto dos cartos ata 1090€ (ou 11466,80 grivnas) que foi o que conseguimos ao final, investiriamolos nós neses produtos dándolle opción a varialos se o vía conveniente. Non lle pareceu nada ben e insistía en que lle adiantásemos os cartos ao almacén que lles servía os alimentos e ela o xestionaría".

Pois ben, cando a chamamos ás 14.15 sabendo que os 34 km. de distancia ata Vorzel’ supoñían arredor de 1h 40min de tempo, díxonos que ás 16.00 ela marchaba e non nos recibiría ninguén pois só ela tiña autoridade para facelo. Avisounos tamén de que o sábado non poderiamos achegarnos alí porque ela non estaría e ninguén nos ía abrir a porta…
Saímos entón ás présas cara a Vorzel’ con intención de levarlles o bolso cos xoguetes e caramelos ademais de darlle as 3000 grivnas para despois intentar volver o sábado cos pañais, deterxente e comida que mercaríamos por valor das 8466,80 grivnas restantes (805€).

Os 34 quilómetros leváronnos algo máis de dúas horas porque tivemos que atravesar camiños de terra cheos de baches, pasar por riba da neve que cubría a estrada, esvarar na lama, contemplar o río conxelado e preguntar dez ou doce veces tras chegar ao punto que nos indicou o GPS e que non tiña nada que ver co que buscabamos…






Chamámola ás 16.00 para dicirlle que nos retrasaríamos e esperou. Ao chegar fomos ao edificio que visitaramos no verán e alí deixamos o bolso dos xoguetes, a coidadora que estaba alí indicounos o edificio no que poderiamos atopar á directora que nos recibiu cuns aires de superioridade e unha antipatía impresionantes. Ao dicirlle que viñamos do outro edificio descolgou o teléfono e botoulle unha boa bronca á coidadora por non avisala de que xa pasaramos por alí… Díxonos que cos xoguetes que trouxeramos podía ser que contaxiásemos enfermidades aos nenos se non viñan ben limpos e que, despois de darlle os cartos, poderiamos estar un momento cos nenos e nenas pero que Rosalía tería que esperar noutro lugar porque carraspeou un par de veces e ela considerou que podía transmitirlles enfermidades aos nenos. (Agggg…)


Tívonos máis de media hora no seu despacho esperando polos fontaneiros porque ela non quería coller os cartos para que vísemos que ían directamente para os traballadores, jajaja. Para dárllelos tivemos que ir a outro edificio próximo pero dixo que había que ir en coche (no noso), ela ía subir atrás con Natasha e Rosalía pero ao abrir a porta e ver que o espazo era escaso rosmou algo en tono burlesco e apartoume a min para subir ela diante… Circulamos tan só 100 metros e alí accedimos a outro despacho dela no que tamén entraron os fontaneiros (se é que eran fontaneiros pois neste punto eu xa perdera toda a confianza que, de entrada, podía ter nela), démoslles as 3000 grivnas e pedinlle que nos fixese un documento para certificar a entrega e poder compartilo aquí con vós, entón volveulle entrar a présa e quedou co meu enderezo electrónico asegurándome que me ía enviar o xustificante por correo electrónico (escribinllo e minúsculas e tamén en maiúsculas para que non houbese dúbidas pero non sei eu se chegará algún día…). A continuación acompañounos a Natasha e mais a min, con paso firme e a cabeza ben erguida, ata unha sala onde había oito ou nove nenos e nenas mentres que Carlos e Rosalía quedaban “illados” noutra sala por mor da tos… 
Ela marchou de contado e cústame crer que non foi “amañar contas” cos supostos fontaneiros. Antes de marchar insistiu en que o sábado estaría pechado e que ninguén nos ía atender porque esas decisións eran só cousa dela e ela non ía estar. En fin…

O pedazo que pasamos cos neniños foi moi agradable, por suposto. Mágoa que a carraxe que eu sentía non me deixase gozar como a ocasión merecía… As coidadoras baleiraron no chan unhas caixas de xoguetes e alí nos entretivemos un pedazo con eles facendo torres con pezas encaixables, argallando  con potas de xoguete ou mesmo “lendo” contos en ruso. As señoras foron moi amables e atentas con nós.








O retorno a Kiev foi moito máis rápido tras marcarlle ao GPS un percorrido alternativo. De camiño paramos nun hipermercado (Auchan) para mirar prezos e ir pensando que produtos mercar ao día seguinte pois decidimos voltar e, se non nos reciben, deixarlles a mercancía na porta. Malo será que non a aproveiten! ;)

Despois achegámonos á casa de Natasha que quería presentarnos á súa familia e convidarnos a cear. Alí estaba a súa nai que resultou ser, como era de esperar, unha muller encantadora e que nos obsequiou cunha cea estupenda, coñecimos tamén aos seus dous irmáns pequenos e faltounos o maior que non estaba na casa. A verdade é que nos sentimos moi afortunados por ter ocasión de coñecer todas estas realidades.

Ás nove da noite despedímonos e percorremos os 15 km que nos separaban do albergue. Demos uns paseos polas inmediacións e despois deitámonos un pouco preocupados pola actitude desa muller pero tamén con ánimo e forza para intentar cumprir co noso cometido.

Moitas grazas a todas e todos vós por darnos, co voso apoio, esta forza e ilusión.
   
Ata mañá!!!